ماراد الـحسیـن اعـلـیـه بس الـنـوح
ولاراد اعلی موده انکت دمه الدمعه
راد ابـد ربـه نمشی انـوعی الغافـین
وبأگلوب المریضه اکـتابنه انـطبعـه
رادالّا نــگــول ابـوجـه کـل ظـلّام
مـاراد الـبشـر یـنـبـاع کـل سـلـعـه
عیشو احرار گال ولاتدنگو الروس
وراد الکل حچینه العـالـم ایسـمعـه
راد النه الشرف والـعـزه والـعـتـبار
راد النه الکـرامـه ورادنـه انـتبـعـه
راد الـچـذب یـنـذم موتمجده الناس
وکـل عشب الـچـذب بیدینه انشلعه
راد انـصـیر نـاصر للـذی مـظـلوم
موفوگ التلول انـصعـده وانـدفـعه
راد الخوف نـمحی مایضل له امچان
وراد الامـل بـلـحـق بـید نـه انزرعه
گــال الحـق یـؤخـذ مایـجی لـلـبـاب
وحـقـک بـیـدک انـتـه لازم اتـطـلعه
گال الموت واحد بس طریقه اشـکال
وکاس الموت کل حی لازم ایجـرعه
اکو موت ابمذلّه واخس موته اتـموت
واکوموت ابکرامه وراسک ایـرفعه
وبقت یمک یسامع انته وحده اخـتـار
لومـوت الکـرامه لـوتـضل رگـعـه
الشاعرعظیم البوخنفر(ابوتوفیق)